Islohotlar interaktiv formatda: raqamli xaritada aks etgan xalq bilan muloqot manzili
Oʻzbekistonda olib borilayotgan islohotlar zamirida inson manfaatlarini ustuvor qoʻyish, fuqarolar bilan ochiq va samarali muloqot oʻrnatish tamoyili yotadi. “Doimo xalq bilan” shiori davlat boshqaruvida yangi mazmun kasb etib, xalqqa xizmat qiladigan tizimni shakllantirishga xizmat qilmoqda.
Oʻzbekistonda olib borilayotgan islohotlar asosida Prezident Shavkat Mirziyoyev tomonidan ilgari surilgan “Doimo xalq bilan” tamoyili yotadi. Bu yondashuv davlat boshqaruvida inson manfaatlarini ustuvor qoʻyish, fuqarolar bilan ochiq muloqot qilish va jamiyat muammolarini joyida hal etishga qaratilgan.
2017 yil mamlakatimizda “Xalq bilan muloqot va inson manfaatlari yili” deb eʼlon qilinishi bilan mazkur tamoyil amalda tatbiq etila boshlandi. Shu yildan eʼtiboran Prezident Xalq qabulxonalari tashkil etildi. Ushbu qabulxonalar fuqarolarning dard-tashvishini tinglash, murojaatlarni oʻrganish va ularga tezkor yechim topishda muhim institutga aylandi.
Davlat xizmatlarini raqamlashtirish yoʻlida ham salmoqli ishlar amalga oshirildi. 2017 yilda Yagona interaktiv davlat xizmatlari portali ishga tushirildi. Murojaat.gov.uz orqali bugunga qadar 10 milliondan ortiq murojaat qabul qilingan. Bu esa fuqarolar davlat idoralari bilan bevosita, qulay va shaffof aloqa oʻrnatish imkoniga ega boʻlganini koʻrsatadi. 2025 yilga kelib mazkur portaldan foydalanuvchilarning qoniqish darajasi 81 foizdan oshdi.
Aholi bilan manzilli ishlash maqsadida “Temir daftar”, “Ayollar daftari” va “Yoshlar daftari” tizimlari joriy etildi. Bu orqali ehtiyojmand oilalarga amaliy yordam koʻrsatilib, ish bilan taʼminlash, daromad manbalarini yaratish va ijtimoiy himoyani kuchaytirishga eʼtibor qaratilmoqda.
Oʻzbekistonning ochiqlik va raqamli islohotlar yoʻlidagi yutuqlari xalqaro reytinglarda ham eʼtirof etilmoqda. Xususan, mamlakat ochiq maʼlumotlar reytingida dunyoda 11-oʻrinni, BMTning elektron hukumat reytingida esa 63-oʻrinni egalladi.
Bu islohotlarning amaliy namunasini Oʻzbekistondagi Islom sivilizatsiyasi markazida yaratilgan “Yangi Oʻzbekiston — yangi Renessans poydevori” boʻlimida ham koʻrish mumkin. U yerda joylashtirilgan “Xalq qabulxonasi” interaktiv xaritasi mamlakatimizning barcha hududlarida xalq bilan muloqot qanday yoʻlga qoʻyilganini yaqqol namoyon etadi.
Sensorli ekranlar orqali tashrif buyuruvchilar Xalq qabulxonalarining faoliyati, murojaatlarni koʻrib chiqish tartibi va davlat xizmatlari haqida batafsil maʼlumot olishlari mumkin. Shuningdek, davlat elektron portallariga bagʻishlangan interaktiv ilova fuqarolarga huquqiy maslahat olish va onlayn xizmatlardan foydalanish imkoniyatini beradi.
Xulosa qilib aytganda, “Doimo xalq bilan” tamoyili Yangi Oʻzbekistonda davlat va jamiyat oʻrtasida ishonchli muloqotni taʼminlayotgan, ochiq va samarali boshqaruv tizimini shakllantirishga xizmat qilayotgan muhim siyosiy yoʻnalish sifatida namoyon boʻlmoqda.