AQShning Mustaqil tadqiqot markazi vakili Islom sivilizatsiyasi markazini “dunyoda yagona tajriba” deb baholadi
AQShning FamilySearch mustaqil tadqiqot markazining Yevropa boʻyicha strategik biznes-menedjeri Tomas Xengst Oʻzbekistondagi Islom sivilizatsiyasi markazi ekspozitsiyalari parchalangan holda emas, balki mintaqa taraqqiyotining barcha bosqichlarini qamrab olgan yaxlit tarixiy hikoya sifatida tashkil etilganni yuqori baholadi.
Oʻzbekistondagi Islom sivilizatsiyasi markazi xalqaro hamjamiyatni eʼtiborini tobora koʻproq jalb etib, turli madaniyatlar va davrlar oʻrtasidagi muloqot maydoniga aylanib bormoqda. Yaqinda Markazga AQShning FamilySearch tashkilotining Yevropa boʻyicha strategik biznes-menedjeri Tomas Xengst boshchiligidagi delegatsiya tashrif buyurdi. Ushbu tashrif muhim voqea boʻlib, Oʻzbekistonning boy tarixiy merosiga xorijiy mutaxassislar qiziqishi naqadar yuqori ekanini yaqqol namoyon etdi.
Markazga kirib kelgan dastlabki daqiqalardanoq Tomas Xengst loyiha koʻlami, meʼmoriy yechim va tarixiy materiallarni taqdim etishdagi zamonaviy yondashuvdan chin dildan hayratda qolganini taʼkidladi. Uning soʻzlariga koʻra, ekspozitsiya parchalangan holda emas, balki mintaqa taraqqiyotining barcha bosqichlarini - islomdan oldingi davrdan tortib bugungi kungacha - qamrab olgan yaxlit tarixiy hikoya sifatida tashkil etilgan. Bunday keng qamrovli yondashuvni u ilgari dunyoning boshqa biror joyida uchratmaganini qayd etdi.
Bu Oʻzbekiston Respublikasi Prezidenti tomonidan ilgari surilgan chinakamga noyob tashabbus. Men dizayn, texnologik imkoniyatlar va tarixning bu yerda qanday taqdim etilganidan mutlaqo hayratdaman. Meni eng koʻp hayratlantirgani - tarixning barcha jihatlari bilan har tomonlama yoritilgani boʻldi. Bunday yondashuvni men dunyoning hech bir joyida koʻrmaganman, – deydi Tomas Xengst.
Tomas Xengst koʻplab mamlakatlarda oʻtmish va bugun bir-biridan ajralib qolganini, bundan natijada odamlar tarixiy davomiylik hissini yoʻqotishini taʼkidladi. Islom sivilizatsiyasi markazida esa, aksincha, davrlar orasida tabiiy va mazmunli uygʻunlik yaratilgan.
Delegatsiya vakili Prezident Shavkat Mirziyoyevning shaxsiy tashabbusi bilan barpo etilgan Markaz ahamiyatini baholar ekan, uning muhim taʼlimiy vazifasini alohida taʼkidladi. Uning fikricha, Markaz nafaqat yosh avlod, balki butun jamiyat hamda mamlakatga tashrif buyurgan xorijiy mehmonlar uchun ham kuchli maʼrifiy manba hisoblanadi.
Tashrif yakunlanishida Tomas Xengst amalga oshirilgan ishlar uchun chuqur minnatdorlik bildirdi va Islom sivilizatsiyasi markazi tarixga boʻlgan hurmatni zamonaviy tafakkur va texnologiyalar bilan uygʻunlashtirgan holda oʻtmish va kelajak orasida mustahkam koʻprik yaratib bergan yarqin namuna ekanini alohida qayd etdi.
