Yangiliklar

Xalqaro kimyo olimpiadasi Boshqaruv hamda ilmiy qoʻmitalari delegatsiyasi Oʻzbekistondagi Islom sivilizatsiyasi markaziga tashrif buyurib, Oʻzbekiston tarixining islomdan avvalgi davridan Yangi Renessansgacha boʻlgan yoʻlini zamonaviy interaktiv ekspozitsiyalar orqali kashf etdi.

Delegatsiya aʼzolari ekspozitsiyaning keng koʻlami va mukammal yaratilganidan hayratda qoldi. Markazning «Shon-Sharaf» zalidagi keng ravoqlar orqali ular tarixiy meros va zamonaviy interaktiv texnologiyalarning uygʻunligini kuzatib, Oʻzbekiston madaniyatining islomdan avvalgi davridan hozirgi kungacha boʻlgan rivojlanishini aniq his qilish imkoniyatiga ega boʻlishdi. Mehmonlar Markaz ekspozitsiyasida tarix va zamonaviy texnologiyalar uygʻunlashganini alohida taʼkidlashdi.

Bu yerda VII asrdan XI-XII asrlargacha boʻlgan davrlarga oid noyob eksponatlar namoyish etilgan boʻlib, ular zamonaviy interaktiv yechimlar bilan boyitilgan. Ayniqsa, buyuk tarixiy shaxslar obrazlarining goʻyo bugungi kun bilan hamnafas tarzda taqdim etilishi delegatsiya aʼzolarida kuchli taassurot uygʻotdi. Interaktiv eksponatlar orqali Oʻzbekiston tarixidagi ayrim shaxslar bilan goʻyoki muloqot qilish, tarixiy jarayonlarni alohida insonlarning hayotiy hikoyalari orqali yanada chuqurroq anglash imkoniyati mavjudligi eʼtirof etildi. 

Jon Leon Kiappes, Xalqaro Kimyo olimpiadasining boshqaruv qoʻmita raisi, London Universitet kolleji professori:

Oʻzbekistonning uzoq tarixini, islom madaniyati kirib kelishidan avvalgi turli madaniyatlarni, keyinchalik yuz bergan Renessans davrlarini, ayniqsa Yangi Renessansni koʻrish juda qiziqarli boʻldi. Mamlakatning bugungi kuni va kelajagini ham aks ettirgan bu ekspozitsiya orqali madaniyat qanday rivojlanib, zamonlar davomida qanday oʻzgarib borganini kuzatish juda goʻzal taassurot qoldirdi. Oʻzbekistondan tashqaridan kelgan inson sifatida bir joyda madaniyatga oid shuncha boy merosni koʻrish, uni bir vaqtning oʻzida his etish imkoniyati juda qadrli. 

Aleksandr Gladilin, M.B.Lomonosov nomidagi Moskva davlat universiteti professori:

Men bunday katta maskanni hech qachon tasavvur ham qilmagan edim. Tarixiy jihatdan ancha boy, mazmunan juda chuqur va nihoyatda qiziqarli. Bu tashabbusni juda yuksak baholayman. Bunday markazlar ayniqsa yoshlar uchun nihoyatda muhim. Chunki ular oʻz mamlakati va bu zaminning haqiqiy tarixini bilishi kerak. Faqat shundagina ular Oʻzbekistonda tugʻilib, yashayotganidan, shu yerda faoliyat yuritayotganidan naqadar baxtli ekanini anglaydi va mamlakatning porloq kelajagi uchun xizmat qiladi.

Jihan Nan, Garvard universitetni tadqiqotchisi:

Sayohat yakunida Qurʼoni karimning noyob nusxasi saqlanadigan xonaga kirganimizda pushti marmar bilan bezatilgan muhit yanada hayratlantirdi. Bular Oʻzbekiston uchun juda noyob va betakror madaniy meros namunalaridir. Men bunday eksponatlarni boshqa mamlakatlardagi muzeylarda koʻrmaganman. Bu Oʻzbekiston uchun mamlakatning nihoyatda chuqur va uzoq tarixini, boy madaniyatini namoyish etish nuqtai nazaridan juda muhim va ajoyib tashabbus. Bu tashrif men uchun juda katta bilim berdi. Ekspozitsiyalar orqali Oʻzbekiston tarixi, madaniyatining rivoji va bu yerdagi xalq haqida juda koʻp yangi maʼlumotlarga ega boʻldim. Bu tajriba men uchun nihoyatda qimmatli boʻldi.