“Qadimgi sivilizatsiyalarga sayohat” – tarixni zamonaviy texnologiyalar orqali jonlantiruvchi immersiv shou sizni kutmoqda!
Oʻzbekistondagi Islom sivilizatsiyasi markazida ilmiy izlanishlar va madaniy-maʼrifiy loyihalar asosida yangi bosqich boshlanmoqda. “Qadimgi sivilizatsiyalarga sayohat” nomi ostida tashkil etilayotgan immersiv shou orqali qadim oʻtmish zamonaviy texnologiyalar yordamida tomoshabinlarga yangicha tarzda taqdim etiladi.
Loyiha doirasida Islomdan avvalgi davrga oid besh muhim sivilizatsiya — Xorazm, Baqtriya, Sugʻd, Choch va Fargʻona madaniy meroslari chuqur ilmiy tadqiq etilmoqda. 1-bosqichda ushbu hududlarda mavjud boʻlgan qadimiy shaharlar, yozuvlar, arxitektura, madaniyat va ijtimoiy hayotga oid tarixiy manbalar oʻrganilib, ularning raqamli texnologiyalar orqali jonlantirilishi koʻzda tutilgan.
Bu haqda “Islomdan avvalgi davr sivilizatsiyalari” boʻlimi koordinatori, tarix fanlari doktori, professor Mirsodiq Isxoqov quyidagicha fikr bildirdi:
– Ushbu immersiv shou zamonaviy talqinda tarixni gavdalantirishi bilan eʼtiborga molikdir. Mahalliy va chet ellik sayyohlar muzeyga tashrif buyurar ekan, uning aynan zamonaviy tarzda tarixni yoritilishidan zavq olishsa ajab emas.
Immersiv shouning asosiy gʻoyasi – qadimiy tarixni raqamli makonda jonlantirish, uni nafaqat koʻrish, balki his qilish imkonini berishdir. Tashrif buyuruvchilar oʻzini goʻyoki qadimgi Baqtriya saroyida yoki Sugʻd bozori ichida turgandek his qilishi mumkin. VR (virtual reallik), 3D modellashtirish, ovoz effektlari va interaktiv elementlar orqali yaratiladigan sahnalar ilmiy asoslangan holda ishlanmoqda.
Bu nafaqat tarixni oʻrganish, balki uni his qilishdir. Oʻzbekiston tarixining turli bosqichlarini har tomonlama yoritishga qaratilgan bu loyiha yurtimiz turizm salohiyatini oshirishga xizmat qiladi. Ayniqsa, xorijiy sayyohlar uchun bu yondashuv oʻziga xos yangilik boʻlib, tarixni zamonaviy estetikada koʻrsatish orqali ularni chuqur taassurotga soladi.