Yangiliklar

Islom dinining tinchlik, bag‘rikenglik va ilm-ma’rifat g‘oyalarini jahon hamjamiyatiga yetkazish nafaqat muayyan bir davlatning, balki butun musulmon olamining umumiy vazifasiga aylanmoqda. O‘zbekiston esa ana shu xalqaro hamkorlikning tashabbuskori sifatida maydonga chiqmoqda. Joriy yilning 7-11 iyul sanalarida Prezident Shavkat Mirziyoyev tashabbusi bilan 40 dan ortiq davlatning 300 ga yaqin davlat va jamoat arboblari, vazirlar, muftiylar, yetuk ulamolar, akademiklar, tadqiqotchilar, muzey va kutubxona rahbarlari, xalqaro tashkilotlar vakillari ishtirokida Toshkent-Samarqand-Termiz shaharlarida o‘tkazilayotgan tinchlik, bag‘rikenglik va ilm-ma’rifat yo‘lini birlashtirgan I xalqaro islom sivilizatsiyasi forumi ana shu tashabbuslarning yana bir amaliy ifodasi bo‘lmoqda. Dunyoning nufuzli olimu ulamolari ushbu forumni yuksak tashabbus deya e’tirof etishmoqda. Islom tarixi, san’ati va madaniyatini tadqiq etish markazi – IRCICA bosh direktori Mahmud Erol Qilich ham shular jumlasidan.

Mahmud Erol Qilich, Islom tarixi, san’ati va madaniyatini tadqiq etish markazi – IRCICA bosh direktori:

Ushbu yuksak tashabbus O‘zbekistonning tarixiy jug‘rofiyasida shakllangan buyuk sivilizatsion yutuqlarni yanada yoritib, ushbu boy merosning asosiy g‘oya va qadriyatlarini kelajakka olib o‘tish uchun yangi hamkorlik yo‘llarini ochmoqda.

Forum bizga ushbu betakror tarixiy hududga yana bir bor aqliy, ma’naviy va qalban, shu bilan birga geografik jihatdan ham sayohat qilish imkonini bermoqda. Movarounnahr, Xuroson va keng Markaziy Osiyo asrlar davomida insoniyat taraqqiyotiga xizmat qilgan, ilm-fanning turli sohalari takomillashtirilgan va insoniyat tafakkuriga ulkan hissa qo‘shilgan buyuk sivilizatsiya markazlaridan biri bo‘lgan. Turli madaniy meroslar uyg‘unlashgan ushbu zaminlarda Islom dinining ilm-ma’rifatga bo‘lgan da’vati hamda davlat rahbarlarining ilm ahliga ko‘rsatgan ko‘magi barcha sohalarda taraqqiyotga xizmat qildi. Bu jarayon islomning ilk asrlarida xalifalik tarkibidagi xonliklardan boshlanib, XIII asrdan keyin hukm surgan ulkan davlatlar, jumladan, Oltin O‘rda, Temuriylar davlati va ularning vorislari davrigacha davom etdi.

Ushbu davrlar mobaynida mintaqa ilm-fan va taraqqiyotning markaziga aylandi. Murakkab tarixiy jarayonlar va zamonlar o‘zgarishiga qaramay, u tashqi mamlakatlar bilan uzluksiz aloqalarni saqlab qoldi. Shu bois mazkur hududning madaniy tarixi musulmon xalqlari xotirasida alohida o‘rin egallaydi. Bu meros men rahbarlik qilayotgan IRCICA — Islom Hamkorlik Tashkiloti huzuridagi hukumatlararo ilmiy-tadqiqot va madaniy muassasa faoliyatida ham muhim o‘rin tutadi. O‘zbekiston bilan hamkorligimiz juda samarali kechmoqda. Zero, Islom sivilizatsiyasi tarixini ushbu zaminda yashab ijod qilgan buyuk allomalar — Imom Buxoriy, Imom Termiziy, Imom Moturidiy, Forobiy, Beruniy, Ibn Sino, Zamaxshariy, Xorazmiy va boshqa ko‘plab ulug‘ zotlar merosisiz tasavvur qilib bo‘lmaydi.

Biz ularning ilmiy merosini o‘rganish, kitoblar nashr etish, ta’lim dasturlarini rivojlantirish va bu bilimlarni Islom Hamkorlik Tashkilotiga a’zo mamlakatlar hamda xalqaro akademik va madaniy jamoatchilikka yetkazish ustida ishlamoqdamiz.

Shu doirada Islom sivilizatsiyasi markazi bilan hamkorligimiz yangi bosqichga ko‘tarildi.
Ushbu ajoyib anjumanni tashkil etgan barcha tashkilotchilarga chuqur minnatdorligimni bildiraman.

Ma’lumot uchun: IRCICA — Islom Hamkorlik Tashkiloti huzuridagi hukumatlararo ilmiy-tadqiqot va madaniy muassasa faoliyatida muhim o‘rin tutadi. Asosiy vazifasi tashkilotning to‘rt qit’ada joylashgan 57 a’zo davlati tarixi, san’ati va madaniy merosini o‘rganish va targ‘ib qilishdir.

Markaziy Osiyo IRCICAning eng muhim faoliyat yo‘nalishlaridan biri hisoblanadi. Biz, ayniqsa, O‘zbekiston, Ozarbayjon, Qozog‘iston, Qirg‘iziston, Tojikiston va Turkmanistonda, shuningdek, qo‘shni davlatlarning ilmiy doiralari bilan ko‘plab ilmiy hamkorlik loyihalarini amalga oshirmoqda.