Хорижий ОАВ биз ҳақимизда

Яманнинг «САБА» ахборот агентлиги Ўзбекистон Президенти Шавкат Мирзиёевнинг мамлакат мустақиллигининг 35 йиллиги муносабати билан Янги Тошкентда ўтказилган тантанали маросимдаги нутқи ҳақида мақола эълон қилди. Унда давлат раҳбари Ўзбекистон тараққиётнинг янги босқичига кирганини таъкидлаб, келгуси ўн йиллик миллий юксалиш ўн йиллиги бўлишини қайд этган. Президент, шунингдек, инсон капитали, иқтисодиёт, соғлиқни сақлаш, экология, қонун устуворлиги, маҳаллий жамоаларни ривожлантириш ҳамда тинчлик ва бағрикенгликни мустаҳкамлашга қаратилган еттита миллий дастур амалга оширилишини маълум қилган.

Саудия Арабистонининг «Ар-Риёд 24» нашри Тошкентда ўтказилган халқаро медиафорум ҳақида мақола эълон қилди. Унда 46 та давлатдан журналист ва медиа вакиллари иштирок этгани, форумда ислом цивилизациясининг тарихий меросини замонавий медиа воситалари орқали дунёга танитиш, сунъий интеллектдан фойдаланиш ҳамда халқаро медиа ҳамкорликни кучайтириш масалалари муҳокама қилингани қайд этилган. Мақолада, шунингдек, форум якунида ҳамкорликка қаратилган ҳужжатлар қабул қилингани ва иштирокчиларнинг Самарқандга ташрифи режалаштирилгани ёритилган.

«Ислом цивилизацияси: янги нигоҳ — янги кашфиётлар» халқаро медиафорумнинг иккинчи қисми Тошкентда «Ўзбекистондаги Ислом цивилизацияси маркази — буюк мероснинг янги таянч маскани» мавзусида ўтказилмоқда. Унда дунёнинг 46 дан ортиқ мамлакатидан ташриф буюрган нуфузли оммавий ахборот воситалари, телеканаллар, ахборот агентликлари раҳбарлари ва вакиллари, журналистлар, продюсерлар, медиа ва маданият соҳаси экспертлари иштирок этмоқда.