Yangiliklar

O‘zbekistondagi Islom sivilizatsiyasi markazi ekspozitsiyasidan o‘rin olgan Qo‘qon xoni qilichi XIX asrga mansub bo‘lib, u yurtimiz harbiy madaniyati va qurolsozlik san’atining yuksak namunasidir. Ushbu eksponat Qo‘qon xonligi davriga oid, oltin, qimmatbaho toshlar va po‘latdan ishlangan. Qilichning umumiy uzunligi 92 santimetrni tashkil etadi. Bu noyob artefakt Londondagi Amir Muhtashamiy kolleksiyasidan vatanimizga qaytarilgan.

To‘rt ming yillik doira. XIV asrlarda tilga olingan dutor. Forobiy va Ibn Sino asarlarida qayd etilgan tanbur va nay. Bu oddiy cholg‘ular emas — ular xalqning tarixiy xotirasi. Bugun ushbu meros yangi avlodga interaktiv tarzda taqdim etilmoqda.

Arxeologik dalillar miloddan avvalgi IV asrda osmon sirlarini ilmiy o‘rgangan eng qadimiy noyob inshoot – Markaziy Osiyoda qadimgi Xorazm hududida joylashgan Qo‘yqirilganqal’a bo‘lganini tasdiqlaydi. Osmon sirlarini o‘rgangan qadimgi rasadxona maketi O‘zbekistondagi Islom sivilizatsiyasi markazi ekspozitsiyasida namoyish etilmoqda.

O‘zbekistondagi Islom sivilizatsiyasi markazi Ikkinchi Renessans ekspozitsiyasining muhim bir qismini tashkil etgan Temuriylar davri tibbiyotiga oid qo‘lyozmalar va manbalardan biri — Najibuddin Abu Homid Muhammad as-Samarqandiyning "Al-asbob va-l-alomat" asariga yozilgan Burhoniddin Kirmoniyning "Sharh ul-asbob va-l-alomat" sharhining asl nusxasi namoyish etmoqda. Bu asar nafaqat tibbiyot ilmiga oid muhim ma’lumotlarni taqdim etmoqda, balki Temuriylar davrining tibbiy an’analarini bugungi kunda qayta tiklashga xizmat qilmoqda.