Xorijiy OAV biz haqimizda

Yamanning «SABA» axborot agentligi O‘zbekiston Prezidenti Shavkat Mirziyoyevning mamlakat mustaqilligining 35 yilligi munosabati bilan Yangi Toshkentda o‘tkazilgan tantanali marosimdagi nutqi haqida maqola e’lon qildi. Unda davlat rahbari O‘zbekiston taraqqiyotning yangi bosqichiga kirganini ta’kidlab, kelgusi o‘n yillik milliy yuksalish o‘n yilligi bo‘lishini qayd etgan. Prezident, shuningdek, inson kapitali, iqtisodiyot, sog‘liqni saqlash, ekologiya, qonun ustuvorligi, mahalliy jamoalarni rivojlantirish hamda tinchlik va bag‘rikenglikni mustahkamlashga qaratilgan yettita milliy dastur amalga oshirilishini ma’lum qilgan.

Saudiya Arabistonining «Ar-Riyod 24» nashri Toshkentda o‘tkazilgan xalqaro mediaforum haqida maqola e’lon qildi. Unda 46 ta davlatdan jurnalist va media vakillari ishtirok etgani, forumda islom sivilizatsiyasining tarixiy merosini zamonaviy media vositalari orqali dunyoga tanitish, sun’iy intellektdan foydalanish hamda xalqaro media hamkorlikni kuchaytirish masalalari muhokama qilingani qayd etilgan. Maqolada, shuningdek, forum yakunida hamkorlikka qaratilgan hujjatlar qabul qilingani va ishtirokchilarning Samarqandga tashrifi rejalashtirilgani yoritilgan.

«Islom sivilizatsiyasi: yangi nigoh — yangi kashfiyotlar» xalqaro mediaforumning ikkinchi qismi Toshkentda «O‘zbekistondagi Islom sivilizatsiyasi markazi — buyuk merosning yangi tayanch maskani» mavzusida o‘tkazilmoqda. Unda dunyoning 46 dan ortiq mamlakatidan tashrif buyurgan nufuzli ommaviy axborot vositalari, telekanallar, axborot agentliklari rahbarlari va vakillari, jurnalistlar, prodyuserlar, media va madaniyat sohasi ekspertlari ishtirok etmoqda.