Yangiliklar

Ayni kunda Toshkentda o‘tayotgan I Xalqaro islom sivilizatsiyasi forumi ishtirokchilari Islom sivilizatsiyasi merosini o‘rganish, asrash, raqamlashtirish va dunyo miqyosida targ‘ib qilishga qaratilgan 10 ta global tashabbusni ilgari surdi. Takliflar orasida Islom sivilizatsiyasi Butunjahon forumi, xalqaro raqamli reyestr, global raqamli kutubxona, xalqaro mukofot, tadqiqot jamg‘armasi, muzeylar ittifoqi va 2030 - yilgacha bo‘lgan xalqaro “yo‘l xaritasi”ni ishlab chiqish kabi tashabbuslar bor.

Prezident Shavkat Mirziyoyev tashabbusi bilan O‘zbekistondagi Islom sivilizatsiyasi markazida bo‘lib o‘tayotgan “I Xalqaro islom sivilizatsiyasi forumi: tinchlik, bag‘rikenglik va ilm-ma’rifat yo‘li” xalqaro forumida Makka shahridagi “Masjid al-Harom” masjidi Bosh imomi Shayx Solih bin Abdulloh bin Humayd ham ishtirok etmoqda.

Islom sivilizatsiyasining haqiqiy mazmun-mohiyatini ochib berish, uning ilm-fan, madaniyat va ma’naviy taraqqiyotga qo‘shgan ulkan hissasini namoyon etish, shuningdek, zamonaviy dunyoda tinchlik, bag‘rikenglik va ma’rifat g‘oyalarini keng targ‘ib qilish maqsadida Prezident Shavkat Mirziyoyev tashabbusi bilan dunyoning 40 dan ortiq davlatidan 300 nafarga yaqin davlat va jamoat arboblari, vazirlar, muftiylar, yetuk ulamolar, akademiklar, tadqiqotchilar, muzey va kutubxona rahbarlari, xalqaro tashkilotlar vakillari O‘zbekistonga tashrif buyurdi.