Хорижий ОАВ биз ҳақимизда

Гонконгнинг нуфузли RTHK (Radio Television Hong Kong) медиаси Ўзбекистонни халқаро сайёҳлар учун тобора жозибадор йўналиш сифатида эътироф этди.

Қатарнинг нуфузли The Peninsula Qatar нашри Доҳадаги Katara Cultural Village мажмуасида Ўзбекистондаги Ислом цивилизацияси марказига бағишланган тақдимот ўтказилганини ёритди. Мақолада ушбу марказ исломий меросни асраш, илмий тадқиқотларни ривожлантириш ва маданиятлараро мулоқотни мустаҳкамлашга хизмат қилувчи йирик маънавий-маърифий лойиҳа сифатида эътироф этилгани таъкидланган. Шунингдек, тадбирда Ўзбекистон ва Қатар ўртасидаги муштарак маданий қадриятлар ҳамда гуманитар ҳамкорлик масалаларига алоҳида урғу берилган.

Халқаро оммавий ахборот воситалари Ўзбекистоннинг бой тарихи ва маданий меросига яна бир бор юксак баҳо бермоқда. Ҳиндистоннинг нуфузли “The Week” нашрида эълон қилинган “Exploring Tashkent, the design capital of Uzbekistan” номли мақолада Тошкент нафақат дизайн ва архитектура шаҳри, балки ислом цивилизациясининг муҳим марказларидан бири сифатида эътироф этилди.

Меъморчилик ва дизайн соҳасидаги нуфузли Archilovers нашрида Prix Versailles 2026 томонидан эълон қилинган “Дунёдаги энг гўзал музейлар” рўйхати ҳақида мақола чоп этилди. Унда Ўзбекистондаги Ислом цивилизацияси маркази дунё миқёсидаги энг илғор музей лойиҳалари қаторида эътироф этилиб, мажмуа нафақат монументал меъморий ечими, балки илм-фан, маданият ва маданий мулоқотни уйғунлаштира олган замонавий маънавий макон сифатида юқори баҳоланди. Мақолада марказнинг Темурийлар меъморчилигидан илҳомланган қиёфаси, Қуръон залидаги мультимедиа ечимлари ҳамда халқаро тадқиқот ва таълим платформаси сифатидаги аҳамияти алоҳида таъкидланган.

Испаниянинг Otralectura нашрида Халқаро китоб куни муносабати билан Ўзбекистон ва Испания ўртасидаги нашриётчилик ҳамкорлигига бағишланган мақола эълон қилинди. Унда Ўзбекистон делегациясининг Mueller & Schindler нашриётига ташрифи доирасида ноёб қўлёзмаларнинг факсимиле нашрлари, “114 Қуръон” халқаро лойиҳаси ҳамда «Темур тузуклари»ни испан тилида нашр этиш ташаббуси муҳокама қилингани қайд этилиб, мазкур мулоқот Ўзбекистоннинг бой маданий меросини Европа илмий ва маданий муҳитида кенг тарғиб этишга хизмат қилаётган муҳим қадам сифатида баҳоланди.