Xorijiy OAV biz haqimizda

Nufuzli Ispaniyaning ABC gazetasida e’lon qilingan maqolada ta’kidlanishicha, Toshkentda ochilgan Islom sivilizatsiyasi markazi Buyuk Ipak yo‘lining boy merosini zamonaviy texnologiyalar bilan uyg‘unlashtirgan yirik madaniy-ilmiy loyiha hisoblanadi. Markaz xalqaro miqyosdagi diqqat markaziga aylanib, unda madaniyat, ilm-fan va zamonaviy g‘oyalar tutashadi hamda sivilizatsiyalar o‘rtasidagi muloqot uchun yangi imkoniyatlar ochadi. Shu bilan birga, u O‘zbekistonning jahon taraqqiyotiga qo‘shgan hissasini qayta anglashga xizmat qiladi.

The Washington Post nashrida e’lon qilingan materialda Toshkentda ochilgan O‘zbekiston Islom sivilizatsiyasi markazi Markaziy Osiyoning boy intellektual va madaniy merosini namoyon etuvchi yirik xalqaro loyiha sifatida baholanadi. Unda mazkur maskan islom sivilizatsiyasining jahon ilm-fani va madaniyati taraqqiyotidagi o‘rnini ochib beruvchi zamonaviy ilmiy-ma’rifiy markaz ekani ta’kidlangan.

Xalqaro nufuzli Euronews nashrida yozilishicha, Toshkentda ochilgan Islom sivilizatsiyasi markazi qo‘lyozmalar, ilmiy tadqiqot infratuzilmalari va interaktiv ko‘rgazmalarni birlashtirgan holda, islomiy merosni ta’lim, texnologiya va xalqaro hamkorlik orqali ommaga taqdim etuvchi yangi global ilmiy-ma’rifiy maskan sifatida e’tirof etilmoqda.

Nufuzli xalqaro nashr The Wall Street Journalda Islom sivilizatsiyasi markazining ochilishiga bag‘ishlangan maqola chop etildi. Unda mazkur markaz Yangi O‘zbekistonning eng yirik madaniy-ilmiy loyihalaridan biri sifatida e’tirof etilgan. Temuriylar me’morchiligi an’analari asosida barpo etilgan hamda O‘zbekiston Respublikasi Prezidenti Shavkat Mirziyoyev mualliflik loyihasi bo‘lgan ushbu markaz Buyuk Ipak yo‘li merosi ilg‘or texnologiyalar va zamonaviy ilmiy yondashuvlar bilan uyg‘unlashgan noyob makon sifatida taqdim etilgan.

Nufuzli tahliliy Eurasia Today nashrida e’lon qilingan mazkur materialda O‘zbekistondagi Islom sivilizatsiyasi markazining ochilishi mintaqa miqyosida yangi madaniy va ilmiy markaz shakllanayotganining muhim ifodasi sifatida talqin etiladi. Maqolada Prezident Shavkat Mirziyoyev tashabbusi bilan amalga oshirilgan ushbu loyiha nafaqat muzey majmuasi, balki intellektual taraqqiyotni rag‘batlantiruvchi, ilmiy izlanishlar va xalqaro muloqotni birlashtiruvchi strategik platforma ekani akademik uslubda asoslab beriladi.